Heim
Stjórn
Um FÁSL
Lög
Fréttir
Fyrri fundir
Rannsóknir í heilbrigðissögu
Hlekkir
Söguhorn

Jón Steffensen

Hildur Gestsdóttir fornleifafræðingur hefur síðan árið 2003 unnið að því að gera heildstæða meinafræðilega úttekt á íslenskum mannabeinum frá landnámsöld og til 18. aldar, með það fyrir augum að leggja grunn að heilsufarssögu þjóðarinnar og frekari rannsóknum á því sviði. Alls hafa verið rannsakaðar 344 beinagrindur , þar af 225 úr átta kirkjugörðum og 79 frá 40 mismunandi kumlastöðum. Við þessa rannsókn voru kyn, lífaldur og líkamshæð greind, varðveisla beingrinda nákvæmlega skráð, og hverri einustu meinafræðilegri breytingu á beinunum lýst, og reynt að nýta þær upplýsingar til að greina einstaka sjúkdóma. Ber þar helst að nefna, hörgulsjúkdóma, gigtarsjúkdóma, smitsjúkdóma, breytingar af völdum áverka og/eða álags og tannsjúkdóma, en allt eru þetta sjúkdómar sem ekki einungis veita upplýsingar um heilsufar, heldur einnig veitt innsýn í lifnaðarhætti fólks til forna, má þar til dæmis nefna mataræði, líkamlegt álag, skyldleika og samgöngur (með athugunum á smitsjúkdómum). Einnig hafa fundist einstök tilfelli af sjúkdómum sem fá tilfelli eru til í fornum beinum í heiminum, sem veita mikilvægar upplýsingar um þessa sjúkdóma, má þar til dæmis nefna spastíska lömun af völdum heilablóðfalls, mergæxli og brjóskkímfrumuæxli. Er þetta í fyrsta sinn á Íslandi sem nútíma beinafræðilegar rannsóknir eru nýttar til að gera heildstæða rannsókn á sjúkdómum í fornum beinum, og eru hafa niðustöður úr rannsókninni bætt svo um munar við læknisfræðilega og fornleifafræðilega þekkingu okkar á Íslendingum til forna.
Hildur Gestsdóttir fornleifafræðingur lauk BA prófi (Hons.) í fornleifafræði frá háskólanum í Nottingham 1994 og MS í beinafræði og fornmeinafræði frá háskólanum í Bradford 1998. Hún stundar nú doktorsnám í fornleifafræði við Háskóla Íslands, og nefnist rannsóknarverkefni hennar Gigt á Íslandi, fornleifafræðileg rannsókn. Hildur hefur starfað sem fornleifafræðingur frá árinu 1994, lengst af hjá Fornleifastofnun Íslands, og hafa aðal rannsóknarverkefni hennar snúið að fornleifauppgreftri á kirkjugörðum, fornmeinafræðilegum rannsóknum á mannabeinum og samsætugreiningu úr tannglerungi til að rannsaka fólksfluting.